Heb 1 | WSK | STEP | Girakala, Kaem tom suen biya prophet alo nuguring te, anananga taleng girigir munan lage suen biya te nunga manarukaso.

Hebrews 1

Jesus mu Kaem ko Kuriang

1 Girakala, Kaem tom suen biya prophet alo nuguring te, anananga taleng girigir munan lage suen biya te nunga manarukaso. 2 Bare tom nukum imi te mu nu ko Namar te nanga maonam. Kaem nu te la mel suen biya beteram, se nu la mel suen la ko kotam bagurukko. 3 Nu Kaem ko koma tata nunguning, se Kaem ko nikitang biyala nukote. Ale noko den sokel ago mu te mel suen biya bitaru se iluwoso. Nu anananga memek siwurokko kueram, umutang nu barasam mu duruk te nama tarigiram ale Kaem Sokel Karogo mu ko kuting sengam mu te daigam ale bagoso. ^{▼▼Heb 1:2-3 Jesus: John 1:3; 2 Cor 4:4,6; Col 1:15-17.}

Jesus mu engel alo nunga kiaram ale nu gira biya nunguningkiri

4 Buta se Kaem ko Namar mu engel alo nunga kualala biya, ale noko nup biya Kaem nu tuam mu nunga nunup kiaram. 5 Kaem iwita noko balam:

“Ni aitak aninga Kuriang,
Se aitak ani nika Niet.” ^{▼▼Heb 1:5 Psalm 2:7; 2 Samuel 7:14.}
Aking balam:

“Ani mu noko Nuet ko bagirikko,
Se nu aninga Kuriang.”
Bare Kaem mu ko engel bo uwutata me manarukaso, mena, bare nu Jesus la maonam.

6 Se aking tom Kaem ko Kuriang suwanta mu ali imi te tai kapurukko mu Kaem iwita balam, noko engel suen la mu Kuriang umu nup patawomonko mam. ^{▼▼Heb 1:6-9 Deut 32:43; Psalm 104:4; Psalm 45:6-7.}

7 Kaem engel alo nunga iwita balam:

“Kaem balso se noko ura kari engel alo mu daula aratoso, tama kuamili aratoso iwitata, aolak ilu gilingisan.”
8 Bare nu ko Kuriang Jesus ko mu iwita balam:

“O Kaem,” mam, “ni tom suen biya ko king sokel ago bagerko.
Ni munan diram te la ka kariimet nunga bitaruko.
9 Ni munan ningo mu ko kuakasam,
ale munan memek mu miakasam.
Buta se Kaem, nika Kaem, mu nika baongam,
yu gureng yawara kimik awete waram,
ale te amilmil ago la ka saki alo nunga ningi ni kualala biya ka beteram se bagasam.”
10 Ale akingtala balam:

“Kari Biya, duap te nunguningkiri ni ali beterem,
ale keta ka kiting te taiti beterem.
11 Nuna mena namomonko, bare ni mu am bagerko.
Nuna guang iwita nama gigira amon,
12 se ni guang moa patungursan iwita nunga moa patunguru se aking iru kuwim te aratomonko.
Bare ni mu, te bagasam butata am bagerkowo,
nika tom me menarukko.” ^{▼▼Heb 1:10-12 Psalm 102:25-27.}
13 Aking ko Kuriang iwita maonam:

“Aninga agiting sengam mu te dagi sager se
ani kari nikerak kagersan mu nunga gi ka siwik duap ningi nunga awurekko.” ^{▼▼Heb 1:13 Psalm 110:1.}
Bare Kaem noko engel alo bo den uwutata me nunga manarukaso, bare Jesus maonam.

Se engel mu anape ya? Engel alo mu nuna bur, Kaem ko ura kari, noko kariimet nunga giokko wore nunga sangarmonko nunga manarso se geragasan. ^{▼▼Heb 1:14: Engel alo: Psalm 91:11; Acts 12:7.}

14